Parola chi veni di luntanu
stralunata mi pari
comu spusina 'a so prima matina.

(Nun sai d'essiri la vuci
d'una tierra
ca dintra chiù nun taci)

Com'un gigillo vidiri ti vogghiu,
sienza fari mali,
chiantu nun purtari
ma riali
Parola che vieni da lontano / stranita mi sembri / come sposina alla sua prima mattina / (Non sai d'essere la voce / d'una terra / che dentro più non tace) 7 Come una gemma vedere ti voglio, / senza far male, / pianto non portare / ma regali


----


C'è un silenziu
di luntani vuci
mmenz'alivi ebiti di suli

(Com'è dura 'a tierra tutta cripi,
com'è duru 'u zappuni nna li manu).

Siccumi,
giallu di fogghi all'aria chiara,
passatu è uttubri
sienza na uccia d'acqua

C'è un silenzio / di lontane voci / tra gli ulivi ebeti di sole / (Com'è dura la terra tutta crepe, / com'è dura la zappa nelle mani). / Seccume, / giallo di foglie all'aria chiara, / passato è ottobre / senza una goccia d'acqua


------



Straniu
luntanu,
ma chi figghiu fui?
Quali smania mi fici partiri!

Ora ca 'a tierra si pigghiò i mei
ca na negghia sunnu i me anni,
l'amici un suspiru di silenziu amaru,
pigghimi 'a manu,
parola virgugnusa,
dammi luci di mimoria
e paci
sinu a quannu 'u ciatu mi teni.


Estraneo / lontano, / ma che figlio fui? / Quale smania mi fece partire! /
Ora che la terra si pigliò i miei / che una nebbia sono i miei anni, / gli amici un sospiro di silenzio amaro, / prendimi la mano, / parola vergognosa, / dammi luce di memoria / e pace / sino a quando il fiato mi tiene.



-------



Lentamenti
nno silenziu
comu si fussi sulu nna me menti,
mori 'u jornu,
scinnennu comu lacrima nno jardinu.

'A me stanza chiudi tuttu 'u munnu,
nent'autru ca stari cun l'amici,
cu i libra ca sunnu 'a me luci.

Ma 'u duluri passa tutti i porti,
veni sienza trummi,
porta 'u culuri niuru di l'abissu.


Lentamente / nel silenzio / come se fosse solo nella mia mente, 7 muore il giorno, / scendendo come una lacrima nel giardino. / La mia stanza racchiude tutto il mondo, / nient'altro che stare con gli amici, / coi libri che sono la mia luce. / Ma il dolore penetra tutte le porte, / viene senza trombe, / porta il colore nero dell'abisso.



-------



Lentamenti,
comu si fussi propriu nenti,
sienza ciatu nè affannu,
comu vulannu,
veni palora addisiata,
palummella,
nna sta sira ca sientu l'arma fuora.

Duci duci
cun tantu amuri
vurria tuccari 'a luci di to pinni
nna stu scuru c'arriva nne me anni.

Ma tu manteni siempri 'u to misteru
sutta l'albulu d'alivi
nno jardinu
ti teni a la luntana
mentri 'a me menti resta a la finestra
assicutannu sonnira e malanni.



Lentamente, / come se fosse proprio niente, / senza fiato né affanno, / come volando, / vieni parola desiderata, / palombella, / in questa sera che sento l'anima fuori. / Dolce dolce / con tanto amore / vorrei toccare la luce delle tue penne / in questo buio che arriva nei miei anni. Ma tu mantieni sempre il tuo mistero / sotto l'albero d'olive / nel giardino / ti tieni alla lontana / mentre la mia mente resta alla finestra / correndo dietro a sogni e a malanni.



-------



Imenta mirrina tutta focu,
com'un ventu passavi nno stratuni
cu to trottu ch'era na mitragghia,
l'aricchi tisi l'occhiu mafiusu,
'u carruzzinu pi tia era na pagghia,
si vutava 'u paisi 'o to passaggiu,
'u patruni ti guidava tuttu tisu.


Giumenta grigia tutta fuoco, / come un vento passavi sulla strada / col tuo trotto che era una mitraglia, / le orecchie tese gli occhi furbi, / il calesse per te era una paglia, / si voltava il paese al tuo passaggio,/ il padrone ti guidava tutto dritto..



-------



Spiaggia di Pilieri
da banna 'o vadduni.
Nun c'erinu sti villi propria a mari,
nun c'erinu sti frotti di palermitani,
'ventu jucava nno cannitu,
i passiri satavanu nna rina.
Iò currevu comu un lebiru stiddu
e a pisci mi ittavu a mari.

A tavula morta
chiudevu l'occhi,
na picciuttedda mi pigghiava 'a manu
purtannumi luntanu,
unni 'u cielu vasa 'u mari



Spiaggia di Pilieri, / d'oltre il vallone. / Non c'erano queste ville proprio sul mare, / non c'erano queste frotte di palermitani, / il vento giocava nel canneto, / i passeri saltellavano sulla rena. / Io correvo come una lepre / e a pesce mi buttavo al mare. / A tavola morta / chiudevo gli occhi, / una giovinetta mi prendeva la mano / portandomi lontano, / dove il ciel bacia il mare.



da "La voce di una sera", prefazione di Alberto Cappi, Quaderni del Battello Ebbro, Porretta Terme, 2008