La comunicazione è come l'amore:
bisogna essere in due
e lo stupro non paga.
(Marcel Bleustein-Blanchet)



Al numero 22 di vico salata all'Olivella stà 'e casa Luparella 'a curatella. Quanno nascette Luparella, s'arrevutajeno tutt''e vasce do' vico. "Ma comme? Se fann''e figlie senza pate?" "Seh, va' trove chi s'é aizato 'o viaggio". Sufia, 'a bulgara, arresecaje 'nu: "Miracolo!", ma manco essa s''o 'mmuccaje. Nanninella 'a castagnara mise fine a tutte chelli tarantelle e comme 'a Sibilla cumana sentenziò: "Faciteve 'e cazze vuoste!" E 'st'auciello ca vulaje stutaje 'a radio do' vico. 'A mamma, 17 anne ma già femmena 'a 15, se chiammava Carmela, in onore della madonna del Carmine detta: la Bruna, accussì tutte quante 'a chiammaveno: 'a nera. 'A matina, appena schiarava 'na lenza 'e sola, 'a mamma 'a metteva fore 'o vascio comme se mette fore 'a porta 'nu sicchio 'e munnezza. 'A nera pe' sore teneve 'e vasule, pe' frate 'e cane e pe' mamma 'na chiorma 'e femmenielli. Mo' mettite tutte cosa 'nzieme e vedite si da' Nera nun 'eva nascere Luparella. Ma turnamme a essa mo': Luparella è nata già crisciuta, ha studiato 'a scola da' saittella, 'a cazzimma l'ha 'mparata 'a Sufia 'a bulgara, 'a cattiveria de' figlie 'e Totore musso 'e puorco, 'e mariuliggi 'a Jennaro 'o puparuolo e 'o puttanismo… 'o puttanismo 'o teneve 'a dinto fuje l'unico regalo da' Nera.
Nera, ne' ja passà 'nu guajo mo' pe' tanno!
Chella vuleva pazzià ch''e bambulelle, quann'era criatura vuleva fa 'a criatura e nun s'accurgeva ca già t''a vennive. Chella vuleva campà dint''o sole e l'he' fatta campà dint''a mmerda.
Nera, ne' ja passà 'nu guajo mo' pe' tanno.
Quanno 'a sera s'arretirava nun le cercave addò era stata, ma: "quanno he' 'bbuscato?". Nun te preoccupave si' aveva magnato, che te ne futteve a te.Si' te purtave poco 'a vattive, si' te purtave assaje t''e gghive a vevere cu' chell'ati zoccole cumm''a te!
Nera, ne' ja passà 'nu guajo mo' pe' tanno.
A sei anne 'e cumpagnelle jetteno 'a scola, 'a primma alimentare, 'e mamme l'accattajene 'a cartella, 'e quaderne e 'e penne. E tu che l'accattaste? Russetto, ombretto e cipria, ll'ate co' mandesino e essa ca' gonna corta, ll'ate ch''e cazettune e essa ch''e cazette nere, ll'ate co' cestino e essa ca' borza 'e lamè.
Nera, ne' ja passà 'nu guajo mo' pe' tanno.
E chill'atu ricuttare ca tenive vicino e ca 'a tuccave ch''e mane sporche e surate e ca' , sempe cu' chelli mmane zuzzose, sporche, luride e cu' ll'ogne nere, 'a facette femmena? Tu c'he' fatte? Te si' girata 'a llà, si? 'O sango do' sango tuojo, 'a carna da' carna toja t''a si' vennuta e pe' cche? Pe' cinche minute 'e decrijo?
Nera, ne' ja passà 'nu guajo mo' pe' tanno.
E accussì, dint''a 'sti vasce senza sole, addò 'o tanfo era 'e casa, Luparella s'è fatta 'rossa, è crisciuta, crisciuta 'nzieme 'o putrio ca' teneve 'ncuorpo, l'he' fatta schifà 'e spiecchi, tanno do' scuorno ca teneve dinto, l'he' sacrificata 'ncoppa all'altare de' miserie 'e ll'uommene. Scuorno p''a faccia toja. Ma già, quale scuorno tu he' maje cunusciuto? Chella vuleva vase e l'he' date sputazzate, carezze e ha azzeccato pacchere, abbracce e so' state mazzate.
Nera, ne' ja passà 'nu guajo mo' pe' tanno.
Mo' t''e fatta vecchia 'a Ne', te faje sotto e nun tiene a chi te pulezza, nun tiene manco 'e diente, 'o veleno ca he' sputato mo' te roseca, dint''a 'stu vascio al numero 22 di vico salata all'Olivella nun ce stà cchiù manco Luparella 'a curatella, te fanno cumpagnia sulo zoccole e scarafune, ll'aria è cupa, puzzulente e triste, fa cavero, l'unico rifrisco t''o danno 'sti lacreme toje, ma mo' che ghiagne a ffà?
Nera, ne' ja passà 'nu guajo mo' pe' tanno.
Ma mo' che ghiagne a ffà? Che ghiagne a ffà? Che d''è, vuò a Luparella? 'A cirche mo'? E primma pecchè nun l'he' cercata? E quanno essa te cercava, tu addò stive? 'A vuò mo' ma mo' è troppo tarde 'a Ne', che t'he' creduto 'e fa? He' semmenato gramegna, e mo'? Che vulisse grano? Ca' tu chiagne e te dispiere, ca' tu prije 'o Pataterno 'e te chiammà, che te cride 'e fa? Cirche perdono? E a chi?, Chi vuò ca te sente 'a Ne'? Vulisse turnà areto? E nun se' po'! Chello ca he' fatto nun 'o facisse cchiù? E nun se' po'. Niente cchiù mazzate e mane sudate? E nun se' po'! Ci aviva penzà primma, mo' è troppo tarde 'a Ne'. Che d'è, tiene l'affanno, te manco 'o sciato? Te ne staje jenno? E' inutile a campà sola, malata e abbandunata? Ma tu nun si' sola 'a Ne', ccà ce stà Luparella 'a curatella oj' ma', Luparella, 'a curatella toja nun te lassa murì sola comm''a 'nu cane. Ma ch'è stato, comme è stato, comm''è pussibile ca 'a ggente s'arreduce accusì 'na chiaveca. Morte chiamma morte, odio chiamma odio, schifo chiamma schifo! Che cazzo campamme a fa, 'a Ne'? Ma j' 'a spezzo 'sta catena 'e malu campà, comme va e comme vene tu me si' mamma e j' te so figlia. T'arricuorde comme se chiamma Luparella 'a curatella? Si? Se chiamma Margarita e l'ultimu petalo 'e 'sta margarita te dice: te voglio bene 'a Ne', e tu me ne vuo' 'nu poco a mme? Che vo' di' 'sta lacrema ca scorre 'all'uocchie tuoje, dulore o pentimento? Perduoname, j' nun voglio essre cumm''a te, j' voglio correre, abballà, zumpà, voglio vevere acqua fresca. Voglio 'nzerrà 'a porta 'nfaccia 'e miserie, voglio arapì 'o balcone de' pensiere mieje pe' fa vulà luntano addò nun 'e veco e sento cchiù. 'A Né, dimme ca ci a pozzo fa, pecché si' m''o dice tu so' sicura 'e ce riuscì, damme 'sta forza, pecché nun è pussibile ca' 'o Pataterno nun ha lasciato, pe' mme, 'nu purtuso 'a ddò pozzo caccià 'a capa e rispirà chell'aria ca' me spetta, ca' m'è duvuta pecché pure Luparella 'a curatella è figlia a isso! Me faje 'e si ca' capa? Si' sempe 'a Nera mia, si? Nera, Ne' ja passà 'nu guajo mo' pe tanno, pecché 'ammo jettato tant'anne dint'o cesso, pecché nun 'ammo capito quanno è bello 'o munno, pecché 'ammo sputato 'nfaccia all'ammore? 'A Ne', nun me lassà, ca' sulo a te nun te ne faccio j'! 'A Ne'… 'a Ne'…, t'evo purtato 'na pastarella, comme s'è fatta fredda, l'avevo purtata pe' tè, ma s'è 'ngessata è addiventata 'nu jaccio, comme 'o friddo da' morte, 'a Ne' nun te ne j', nun te ne j' … 'A Ne', ja passà 'nu guajo mo' pe' tanno, pure mo' ca ce simme 'ncuntrate me vaje a chillu servizio? Me lasse? ? 'A Ne', nun me lassà, ca' sulo a te nun te ne faccio j'! 'A Ne'…, 'a Ne'…, 'a Ne'…
E che sfaccimme mo' ca te trovo te perdo? Nun è giusto, nun è giusto…